كشف محمد السيد صاحب "كلب شارع الأهرام"، تفاصيل ذبح كلب على يد بعض الأشخاص بطريقة وحشية.وقال خلال مداخلة هاتفية بالإعلامي وائل الإبراشي مقدم برنامج "العاشرة مساءً" على شاشة "دريم2": "أنا نزلت مرة الشارع وكان معايا الكلب، وهو مش مترخص بس أنا مربية تربية عالية، مش هيأذي حد، وفي اليوم دا جري ورا قطة في الشارع، لقيت واحد بيقولي حوش الكلب بتاعك، فقولتله هو مش هيعمل حاجة، فحصلت مشاجرة بيننا، الكلب لما شاف الراجل بيضربني جه وهجم عليه، بس أنا شيلته عنه ومضرهوش".
وأضاف: "الشخص اللي اتخانق معايا، اتصل بناس تبعه وفجأة لقيت نحو 40 واحد معاهم سلاح أبيض وجاين يتخنقوا معايا، وأنا لوحدي فسبت الكلب يجري وراهم، وبالفعل جريوا من قدامه، وناديت عليه رجعلي تاني، وأول ما رجع الناس هجمت عليا فهو دافع عني وعض 8 منه.. وفوجئت تاني يوم إن الشخص دا وأصحابه قدموا بلاغ ضدي، وفضلت 4 شهور برا البيت عشان خايف البوليس يقبض عليا، وبعدها عملنا قاعدة عرفية وصالحت الراجل بس الناس اللي معاه اشترطوا عليا إني أسلم لهم الكلب عشان يقتلوه، مقابل إنهم يتنزلوا عن المحضر، حاولت إرضائهم بأي حاجة تانية رفضوا".
وتابع: "أنا مقدرتش أسلم لهم الكلب، واديته لواحد صاحبي سلمه للأهالي، وشفت اللي عملوه مع الكلب بعنيا ومقدرتش أعمله حاجة، مع أنه كان وفيا لي، كل ضربة نزلت عليه وجعتني أنا".
شاهد المحتوى الأصلي علي بوابة الفجر الاليكترونية - بوابة الفجر: بالفيديو.. تفاصيل عملية "ذبح كلب شارع الأهرام"
0 التعليقات:
إرسال تعليق