قامت مبادرة "أنا مش هسكت على التحرش" منذ قليل، بنشر شهادة فتاة تعرضت للتحرش الجنسى داخل محطة مترو الأنفاق وقامت بتقديمه للأمن.
نص الشهادة:
السلام عليكم أنا حصلت معايا واقعة تحرش يوم الاثنين 20/10. كنت في المترو وواحد حيوان مد ايده عليا، أنا الأول جاتلي حالة ذهول وفضلت أقوله بعلو صوتى أنت سافل وقليل الأدب ووالله ما هاسيبك معظم إللى نحوه كانوا شباب حاولوا يهدوني ويقول لي اهدي وأنا أقول والله ما هاسيبه والمذهل أن راجل كبير في الخمسينات تقمص دور المطيباتي وكان عايزني اسيبه قلتله لو بنتك هاتسيبه الراجل كان بيبصلي بنظرة كأني مفترية أو مذنبة قلتله اعتقد أن لبسي واسع بما فيه الكفاية وإني لا مطلعة من حجابي قصة ولا شكلى غريب علشان أي حد مريض يقول لبسكوا السبب، قلت للكل اللي واقفين لو فيكوا راجل يوديهولي للأمن أو يروح يجيب الأمن وما تسيبهوش يمشي، وفعلا لسه في شباب محترمة ووقفوا جنبي وجابولي الأمن واحنا طالعين لمكتب الأمن المتحرش فضل يستعطفني ويتأسف ويقولي حرام عليكى هاتقطعي عيشي أنا من الصعيد قلتله أنت لازم تتفضح وأي واحد حيوان واقف دلوقتي بيفكر يعمل زيك يكون عبرة طلعت عند مدير أمن المترو وبصراحة كان محترم وقالي اوعى تتنازلي ورحت عملت محضر والظابط وأمين الشرطة بعد ما خلصوا المحضر فضلوا ياكدوا عليا اوعى تتنازلي أنت اللي هاتضيعي حقك بنفسك، وروحت النيابة وكيل النيابة الأول كان مريضا من المرضى وكان رده عليا أنت مكبرة الموضوع كده ليه، قلتله والله لو انت مش شايفه كبير هو بالنسبة لى كبير، راح سألني وباباكي بقى قالك اعملي محضر قلتله اه وقالي اوعى تتنازلي وبعد شويه دخلتله تاني لأن المتهم كان وصل قالي برضه مش هاتتنازلي قلتله لأ، والحمد لله أهلي كلهم كانوا واقفين جنبى وفاخورين برد فعلي، والحمد لله أن دخلت لوكيل نيابة تاني ده اللي حقق معايا رسمى فعلا كان إنسان في قمة الاحترام والأخلاق وكان متعاطفا معايا جدا هو وزمايله وكانوا بيطمنوني وقالولي إنشاء الله هاياخد جزاءه والمتحرش خد أربع أيام على ذمة التحقيق، وإنشاء الله عندى أمل في ربنا أنه يأخذ حكم بثلاث سنين حبس.
الهدف من رسالتي أولا أن كل حيوان بيفكر يأذى بنت في الشارع سواء بالكلام أو الفعل لازم يعرف أننا خلاص مش هانسكت تاني ولا هانخاف ومش هانسيب حقنا، ما ينفعش احنا اللي نتحبس في بيوتنا ومننزلش وما نتأخرش وأنت تعيشوا حياتكم يعني انتم المجرمين واحنا اللي بنتعاقب وبقول لكل بنت أوعى تسيبي حقك.
0 التعليقات:
إرسال تعليق